ຫວຽດນາມປະສົບຜົນສຳເລັດໃນການແຂ່ງຂັນລາຄາຈຳໜ່າຍເຂົ້າ.
ຫວຽດນາມຫາກໍ່ໄດ້ເຊັນສັນຍາຂາຍເຂົ້າໃຫ້ກັບປະເທດຟີລີບປິນ 300.000ໂຕນ ໃນວັນທີ 3 ທັນວາຜ່ານມາໃນລາຄາໂຕນລະເກືອບ 650ໂດລາ, ມີກຳນົດມອບ-ສົ່ງລະຫວ່າງເດືອນກຸມພາ ຂອງປີ 2010 ນີ້. ໜັງສືພິມ ໄຊງອນ ຍາຍຟົງ (Saigon Gaia Phong) ລາຍງານໂດຍໄດ້ອ້າງອີງຕາມການເປິດເຜິຍ ຂອງບໍລິສັດວຽດນາມ ຟູດ 2, ຜູ້ສົ່ງອອກຂະໜາດໃຫຍ່ອີກບໍລິສັດໜຶ່ງ ໃນເຂດທີ່ຮາບປາກແມ່ນ້ຳຂອງ.
ຈົນເຖິງປັດຈຸບັນ ຫວຽດນາມໄດ້ປະສົບຜົນສຳເລັດ ໃນການແຂ່ງຂັນທາງດ້ານ ລາຄາຈຳໜ່າຍເຂົ້າໃຫ້ ແກ່ປະເທດຟີລິບປິນລວມທັງໝົດ 750,000ໂຕນ, ມີແຜນ ການມອບ-ສົ່ງທັງໝົດປີນີ້.
ນັບເປັນຂໍ້ມູນຫຼ້າສຸດກ່ຽວກັບການຈຳໜ່າຍເຂົ້າໃຫ້ແກ່ປະເທດຟີລິບປິນເຊິ່ງເປັນຜູ້ນຳເຂົ້າເຂົ້າຂະໜາດໃຫຍ່ທີ່ສຸດຂອງໂລກ. ຫຼັງຈາກການແຂ່ງຂັນລາຄາໃນ ວັນທີ 4 ພຶດສະພາ ຜ່ານມາ, ເຂົ້າຫວຽດນາມໄດ້ກວາດໄປ 150,000 ໂຕນ. ຜູ້ສົ່ງເຂົ້າຈາກປະເທດໄທເຊິ່ງເປັນຜູ້ສົ່ງເຂົ້າໄປຂາຍຕ່າງປະເທດຫຼາຍທີ່ສຸດໃນໂລກ ກໍ່ໄດ້ເຂົ້າຮ່ວມການແຂ່ງຂັນທາງດ້ານລາຄາຄັ້ງນີ້, ແຕ່ບໍ່ໄດ້ຮັບຜົນຫຍັງເລີຍ.
ສະມາຄົມອາຫານຫວຽດນາມໄດ້ກ່າວໃນໄລຍະກ່ອນໜ້ານີ້ ວ່າຕົນພ້ອມທີ່ຈະເຈລະຈາຂາຍເຂົ້າໃຫ້ແກ່ປະເທດຟີລິບປິນອີກ 1,5 ລ້ານໂຕນໃນປີນີ້ ທັນທີທີ່ການແຂ່ງຂັນລາຄາໃນວັນທີ 4 ພຶດສະພາ ປີ 2008 ຜ່ານພົ້ນໄປໃນປີ 2008. ຫວຽດນາມໄດ້ເຊັນຈຳໜ່າຍເຂົ້າໃຫ້ປະເທດດັ່ງກ່າວ ຈຳນວນ 1,5 ລ້ານໂຕນຕັ້ງແຕ່ເດືອນມີນາ, ຄິດເປັນ85% ຂອງປະລິມານການນຳເຂົ້າທັງໝົດ1,775ລ້ານໂຕນໃນປີຜ່ານມາ.
ສະມາຄົມອາຫານຫວຽດໄດ້ກ່າວວ່າ 11 ເດືອນທຳອິດຂອງປີຜ່ານມາ, ຫວຽດນາມໄດ້ສົ່ງອອກເຂົ້າທັງໝົດ 5,6 ລ້ານໂຕນ ແລະໄດ້ມອບ-ສົ່ງອີກ1,1ລ້ານໂຕນໃນເດືອນທັນວາຜ່ານມາເຊິ່ງເຮັດໃຫ້ເຂົ້າທີຖືກສົ່ງໄປປີ 2009 ມີປະລິມານລວມກັນທັງໝົດ6,7ລ້ານໂຕນ. ເປັນປະລິມານຫຼວງຫຼາຍຢ່າງເປັນປະຫວັດການ.
ຫວຽດນາມເປັນປະເທດສົ່ງເຂົ້າໄປຕ່າງປະເທດຂະໜາດໃຫຍ່ ເປັນອຳດັບ 2 ຂອງໂລກ ພ້ອມຈະເຈ ລະຈາກັບປະເທດຟີລິບປິນ ເພື່ອຈຳໜ່າຍເຂົ້າອີກ1,5ລ້ານໂຕນສຳລັບປີນີ້. ອີງຕາມຕົວເລກຂອງກະຊວງກະສິກຳ ແລະ ພັດທະນາຊົນນະບົດ, ພຽງແຕ່ເດືອນຕຸລາຜ່ານມາ ເດືອນດຽວ ຫວຽດນາມໄດ້ສົ່ງເຂົ້າອອກເຖິງ 370,000ໂຕນ, ປີຜ່ານມາມີພຽງ 29,000ໂຕນ ແລະ ລາຍຮັບໄດ້ເພີ່ມຂຶ້ນເປັນ 140 ລ້ານໂດລາ ຈາກພຽງແຕ່ 14 ລ້ານໂດລາ ຕະຫຼາດຫຼັກຂອງເຂົ້າຫວຽດນາມແມ່ນປະເທດຟີລິບປິນ, ອິນໂດເນເຊຍ, ກູບາ ແລະ ອີລັກ. ນອກຈາກນັ້ນຫວຽດນາມຍັງໄດ້ສົ່ງເຂົ້າໄປຍັງອາຟຣິກາ ແລະ ຕາເວັນອອກກາງ ໃນປະລິມານທີ່ເພີ່ມສູງຂຶ້ນຢ່າງຫຼວງຫຼາຍອີກດ້ວຍ ເຊິ່ງໃນໄລຍະ 9 ເດືອນຂອງປີຜ່ານມາ, ໄດ້ຂາຍໃຫ້ປະເທດໃນທະວີບອາຟຣິກາເພີ່ມຂຶ້ນເຖິງ 98% ຫຼື 1,4 ລ້ານໂຕນ ແລະ ເພີ່ມ 65% ສຳລັບຕະຫຼາດໃນຕະຫຼາດໃນຕາເວັນອອກກາງເປັນ 250,000 ໂຕນ.
ໂດຍ: ພູຄຳ
ຂ່າວການຄ້າ